မြန်မာယူနီကုဒ် စာလုံးများ -၄ မှီခိုသင်္ကေတများ

ရေးချ နှစ်မျိုး ရှိသည်။ မောက်ချ (ါ)နှင့် ဝိုက်ချ (ာ) ဟူ၍ ကွဲပြားပါသည်။ နှစ်ခုစလုံးကို အသိအမှတ်ပြု၍ ကုဒ်ပွိုင့်တစ်ခုစီ သတ်မှတ်ထားပါသည်။ မောက်ချ (ါ) U+102B ၊ ဝိုက်ချ (ာ) U+102C အသီးသီး ဖြစ်ပါသည်။ ပုံမှန်သရများ ဖြစ်သော ရေးချ ( မောက်ချ “ါ” / ဝိုက်ချ “ာ” ) ၊ လုံးကြီးတင် “ိ” ၊ လုံးကြီးတင်ဆံခတ် “ီ” ၊ တစ်ချောင်းငင် “ု” ၊ နှစ်ချောင်းငင် “ူ” ၊ သဝေထိုး “ေ” ၊ နောက်ပစ် “ဲ” တို့အပြင် သေးသေးတင် “ံ” ကိုလည်း သံပြောင်းသင်္ကေတအဖြစ် ယူပါသည်။

သံပြောင်းသင်္ကေတများ အချို့ကို အချင်းချင်းတွဲ၍ ထပ်ပွားသရသံများကို ရေးသားနိုင်ပါသည်။ သို့သော် သူ့အစုံနှင့်သူသာ တွဲရေးနိုင်ပါသည်။ တွဲဖက်ရေးသားနိုင်သော သရအစုံများမှာ –

အော သံ

  • ” ေါ ” (U+1031 U+102B)
  • ” ော ” (U+1031 U+102C)

အော် သံ

  • ” ေါ် ” (U+1031 U+102B U+103A)
  • ” ော် ” (U+1031 U+102C U+103A)

အို သံ

  • ” ို ” (U+102D U+102F)

အုံ သံ

  • ” ုံ ” (U+102F U+1036)

သင်္ကေတတွဲများကို အစဉ်အတိုင်း မရေးလျှင် စံသတ်မှတ်ထားသောအစဉ် မဟုတ်သဖြင့် အမှားအယွင်းဖြစ်နိုင်ပါသည်။ သင်္ကေတတွဲအဖြစ် မသတ်မှတ်ထားသော သရများအချင်းချင်း ယှဉ်ရေးလျှင်လည်း ရေးထုံးဖတ်ထုံးမရှိသည့်အတွက် ရှုပ်ထွေးမှုများသာ ဖြစ်နိုင်ပါသည်။ ထို့ကြောင့် ဗျည်းနောက်သရလိုက်ရန်၊​ သင်္ကေတချင်း ရှေ့နောက်မလွဲစေရန် ရေးသားသိမ်းဆည်းရာတွင် သတိပြုရပါသည်။ အချို့ဆော့ဝဲလက်ကွက်များတွင် အစဉ်အမှားများကို ပြန်စနစ်ကျစေရန် လုပ်ဆောင်ပေးသည့်ဖန်ရှင် ပါဝင်ပါသည်။ Smart keyboard များ ရှိပါသည်။ သို့သော် Unicode-clean ဖြစ်မဖြစ် စစ်ဆေးရာတွင် အစီအစဉ်အမှန်ကို သိနားလည်ထားဖို့ လိုပါသည်။

2 thoughts on “မြန်မာယူနီကုဒ် စာလုံးများ -၄ မှီခိုသင်္ကေတများ”

  1. ဘာကြောင့် ရေးချ ၂ မျိုးက ကုဒ်ပွိုင့် ၂ခု ဖြစ်နေရသလဲ သိချင်ပါတယ်။
    ကျွန်တော်သိထားသလောက်က ဝိုက်ချနဲ့ ရေးရင် အခြားစကားလုံးနဲ့ သွားဆင်တူနေတဲ့ ‘ခ’ ‘ဂ’ ‘င’ ‘ပ’ ‘ဒ’ ‘ဝ’ ဆိုတဲ့ဗျည်း (၆) လုံးကို ‘အာ’ သရ သင်္ကေတနဲ့တွဲလိုတဲ့အခါ ‘မောက်ချ’ ကို သုံးရမှာဖြစ်ပြီး ကျန်တဲ့ဗျည်းတွေကိုတော့ ‘ဝိုက်ချ’ နဲ့ တွဲသုံးရမယ်ဆိုပြီး သိထားပါတယ်။
    ဒါဆို ရေးချကိုပဲ ကုဒ်ပွိုင့်တစ်ခုပဲ ထားပြီး ( ြ )ရရစ်တို့ (ျ) ယပင့်တို့ အတိုအရှည်တွေလိုမျိုး ပြောင်းပြလိုက်ရင် ပို မရှင်းသွားဘူးလား။

Leave a Reply

Your email address will not be published. Required fields are marked *