Myanmar Unicode Area (MUA) ၏ သဘောထားထုတ်ပြန်ချက်

မြန်မာယူနီကုဒ်စံကူးပြောင်းရေးလုပ်ငန်းစဉ်

 Myanmar Unicode Area (MUA) ၏ ဆောင်ရွက်ချက်များ နှင့် သဘောထားထုတ်ပြန်ချက်

၁ ။ ကွန်ပျူတာသုံးမြန်မာစာစနစ် ဖွံ့ဖြိုးတိုးတက်ရေးနှင့် တိုင်းရင်းသားစာပေများအရေးကို ရှေးရှုပြီး မြန်မာယူနီကုဒ်စံကူးပြောင်းရေး လုပ်ငန်းစဉ်ကို အစိုးရကဦးဆောင်၍ ဆောင်ရွက်ပေးပါရန် ဇူလိုင်လ (၁၅) ရက်နေ့ရက်စွဲဖြင့် နိုင်ငံတော်အတိုင်ပင်ခံပုဂ္ဂိုလ်ရုံးသို့ စာတင်ခဲ့ပါသည်။

၂ ။ ဇူလိုင်လ (၂၄) ရက်နေ့တွင် “ကွန်ပျူတာသုံးမြန်မာစာစံစနစ်ကူးပြောင်းရေးဆိုင်ရာကော်မတီ” အစည်းအဝေးကို ပညာရေးဝန်ကြီးဦးဆောင်၍ ခေါ်ယူကျင်းပခဲ့ရာ MUA မှ ကိုယ်စားလှယ်များ ပါဝင်တက်ရောက်၍ ရှင်းလင်းတင်ပြခဲ့ပါသည်။ အစိုးရဌာနအားလုံး ယူနီကုဒ်စံစနစ် တစ်မျိုးတည်းကိုသာသုံးစွဲရန် ဆုံးဖြတ်ချက်အပါအဝင် တစ်ပြည်လုံးယူနီကုဒ်စံကူးပြောင်းရေးလုပ်ငန်းစဉ် အကောင်အထည်ဖော်နိုင်ရန် ဆုံးဖြတ်ချက်များကို အစည်းအဝေးမှ ချမှတ်နိုင်ခဲ့ပါသည်။

၃ ။ ဇူလိုင်လ (၂၉) ရက်နေ့တွင် MUA မှ ရေးဆွဲထားသည့် ကူးပြောင်းရေးလုပ်ငန်းစဉ်အစီအစဉ်နှင့် မြန်မာနိုင်ငံကွန်ပျူတာအသင်းချုပ် (MCF) မှ ရေးဆွဲထားသည့် ကူးပြောင်းရေးလုပ်ငန်းစဉ် နှစ်ရပ်အားညှိနှိုင်းသည့် အကြိုအစည်းအဝေးတစ်ရပ်ကို Kanaung Hub တွင် ကျင်းပခဲ့ရာ၊ MUA မှ ကိုယ်စားလှယ်များ၊ MCF မှ ကိုယ်စားလှယ်များနှင့် ပြင်ပပညာရှင်များ တက်ရောက်ခဲ့ကြပါသည်။ ကူးပြောင်းရေး အစီအစဉ်နှစ်ရပ်ကိုညှိနှိုင်း၍ ကူးပြောင်းရေးအစီအစဉ်သစ် ရေးဆွဲပေးပါရန် MUA ကိုယ်စားလှယ်များအား တာဝန်ပေးအပ်ခဲ့ပါသည်။ ထို့အပြင် ကူးပြောင်းရေးလုပ်ငန်းစဉ်ကို ကြီးကြပ်တာဝန်ယူရန် ပြည်ထောင်စုအဆင့် အဖွဲ့အစည်းတစ်ရပ်ကို ဖွဲ့စည်းဆောင်ရွက်ရန် လိုအပ်သည်ဟုလည်း သဘောတူခဲ့ကြပါသည်။

၄ ။ MUA ကိုယ်စားလှယ်များက (၂) ရက်အတွင်း ကူးပြောင်းရေးအစီအစဉ်အသစ်ကို (အသေးစိတ်) ရေးဆွဲ၍ လိုအပ်သလို ဆက်လက်ညှိနှိုင်းအကောင်အထည်ဖော်နိုင်ရန် ဇူလိုင်လ (၃၁) ရက်နေ့တွင် MCF အပါအဝင် တာဝန်ရှိသူများထံ ပြန်လည်ပေးပို့ခဲ့ပါသည်။ MCF မှ လိုအပ်သလို ညှိနှိုင်းပြီးနောက် ကူးပြောင်းရေးလုပ်ငန်းစဉ် အမြန်ဆုံးစတင်နိုင်ရန် ရက်ပိုင်းအတွင်း “ကွန်ပျူတာသုံးမြန်မာစာစံစနစ် ကူးပြောင်းရေးဆိုင်ရာကော်မတီ” အစည်းအဝေးခေါ်၍ တရားဝင်တင်ပြရန် ဖြစ်ပါသည်။

၅ ။ ယခုအခါ ကူးပြောင်းရေးလုပ်ငန်းစဉ် အမှန်တကယ်စတင်နိုင်ခြင်းမရှိသေးသော်လည်း၊ ဇူလိုင်လ (၂၄) ရက်နေ့အစည်းအဝေးဆုံးဖြတ်ချက်များ သတင်းမီဒီယာများတွင် ပါဝင်လာသည့်အတွက် အချို့သောအစိုးရဌာနများ မြန်မာယူနီကုဒ်စံကူးပြောင်းရေးကို မိမိတို့အစီအစဉ်ဖြင့် စတင်နှင့်ကြသည်ကိုလည်း တွေ့ရှိရပါသည်။ ကြီးကြပ်တာဝန်ယူမည့်အဖွဲ့အစည်း မရှိသေးသည့်အတွက် အစီအစဉ်မကျမှုကြောင့် မလိုလားအပ်သည့် နောက်ဆက်တွဲရလဒ်များ ထွက်ပေါ်လာမည်ကို MUA မှ စိုးရိမ်ပူပန်မိပါသည်။

၆ ။ MUA နှင့် မြန်မာနိုင်ငံကွန်ပျူတာအသင်းချုပ် (MCF) တို့၏ လက်ရှိပူးပေါင်းဆောင်ရွက်မှုတွင် နှောင့်နှေးကြန့်ကြာမှုအချို့ ရှိနေသည်ကို တွေ့ရပါသည်။ လိုအပ်သည်ထက် ပိုမိုနှောင့်နှေး ကြန့်ကြာလာပါက (အစီအစဉ်မကျမှုကြောင့် ဖြစ်ပေါ်လာသည့် မလိုလားအပ်သော နောက်ဆက်တွဲရလဒ်များကို ရှောင်ရှားနိုင်ရန်) MUA အနေနှင့် တာဝန်ရှိသူများနှင့် တိုက်ရိုက်ဆက်သွယ်၍ မိမိတို့၏ ရပ်တည်ချက်နှင့်အစီအစဉ်အတိုင်း (အမြန်ဆုံး) ဆက်လက်ဆောင်ရွက်သွားမည် ဖြစ်ပါသည်။

သဘောထားထုတ်ပြန်ချက်ရယူရန်

Myanmar Unicode Area (MUA)