ကွန်ပျူတာသုံးမြန်မာစာစံစနစ် ကူးပြောင်းသုံးစွဲရေးဆိုင်ရာ ကော်မတီဖွဲ့စည်းခြင်း
ကွန်ပျူတာသုံးမြန်မာစာ စံစနစ် (သို့မဟုတ်) မြန်မာယူနီကုဒ် စနစ်အား ကူးပြောင်း၊ ပြောင်းလဲ အသုံးပြုရေးအတွက် နိုင်ငံတော်အဆင့်ဖြင့် ဆောင်ရွက်ရန် ကော်မတီ တစ်ခု ဖွဲ့စည်းပြီးစီးကြောင်း သိရပါသည်။ ဒီသတင်းကို ကြားရတာ အလွန်အင်မတန်မှ အားတက်စရာဖြစ်ပါသည်။ ကျွန်တော်တို့နိုင်ငံမှာ စနစ်အမျိုးမျိုးနဲ့ သူ့စာ ကိုယ်မမြင်ရ ကိုယ့်စာ သူမမြင်ရ ပြဿနာတွေကို အမြန် ရပ်တန့်နိုင်ဖို့အတွက် နိုင်ငံတော် အဆင့်ဖြင့် ဆောင်ရွက်တော့မည် ဆိုသည့်အတွက် အလွန် ဝမ်းမြောက်စွာ ကြိုဆိုပါသည်။
ဒီကော်မတီ ဖွဲ့စည်းတာနဲ့ ပတ်သက်ပြီး မပြောခင်မှာ မြန်မာစာနှင့် ဘာသာစကား ပညာရေးဦးစီးဌာန(ယခင် မြန်မာစာအဖွဲ့ ဦးစီးဌာန) အကြောင်း အရင် ပြောလိုပါသည်။ မြန်မာစာအဖွဲ့ဦးစီးဌာနအား ၂၀၁၅ ခုနှစ် ဧပြီလမှာ ပြင်ဆင်ဖွဲ့စည်းခဲ့တယ်လို့ သိရပါသည်။ အဓိက ရည်ရွယ်ချက်ကတော့ မြန်မာနိုင်ငံ၏ ရုံးသုံးစာအဖြစ်သတ်မှတ်ထားသော မြန်မာစာအပြင် ပြည်ထောင်စုဖွားတိုင်းရင်းသား အားလုံးတို့၏ ဘာသာစကား၊ စာပေ၊ ယဉ်ကျေးမှု၊ အနုပညာနှင့် ဓလေ့ထုံးစံများဖွံ့ဖြိုးရေးအတွက် သင်ကြားရေးတွင်ညှိနှိုင်းအထောက်အကူပြုရန် ဖြစ်တယ်လို့ သိရပါသည်။ ကွန်ပျူတာသုံးမြန်မာစာ စနစ်တွင် တိုင်းရင်းသား ဘာသာစကားတို့ ပိုမိုတိုးတက်လာရန်အတွက် ဒီအဖွဲ့အစည်းက ပူးပေါင်းပါဝင်ကူညီမှာ ဖြစ်တယ်လို့ သိရပါသည်။
ကွန်ပျူတာသုံးမြန်မာစာစံစနစ် ကူးပြောင်းသုံးစွဲရေးဆိုင်ရာ ကော်မတီအား ၎င်းမြန်မာစာနှင့် ဘာသာစကားပညာရေးဦးစီးဌာနမှ ညွှန်ကြားရေးမှူးက ဥက္ကဌအဖြစ် ဆောင်ရွက်ပြီး၊ မြန်မာနိုင်ငံ ကွန်ပျူတာအသင်းချုပ် ဥက္ကဌမှ ဒုတိယဥက္ကဌအဖြစ် ဦးဆောင်ကာ မြန်မာစာဌာနမှ အဖွဲ့ဝင်များ၊ မြန်မာနိုင်ငံ ကွန်ပျူတာအသင်းချုပ်မှ အဖွဲ့ဝင်များ၊ မြန်မာကွန်ပျူတာ ပညာရှင်များအသင်းမှ အဖွဲ့ဝင်များ၊ မြန်မာဖောင့် ရေးစွဲသူ ပညာရှင်များ၊ မြန်မာယူနီကုဒ်ဧရိယာမှ ကိုယ်စားလှယ်တစ်ဦးနှင့်၊ ဝန်ကြီးဌာန အသီးသီးမှ တာဝန်ရှိသူများ ပါဝင်တယ်လို့ သိရပါသည်။
ကော်မတီဝင်များ
| အမည် | ဌာန | ကော်မတီရာထူး တာဝန် |
|---|---|---|
| ညွှန်ကြားရေးမှူးချုပ် | မြန်မာစာနှင့် ဘာသာစကားပညာရေးဦးစီးဌာန | ဥက္ကဌ |
| ဥက္ကဌ | မြန်မာနိုင်ငံ ကွန်ပျူတာအသင်းချုပ် | ဒုတိယ ဥက္ကဌ |
| ဒေါက်တာမြင့်ကြည် | မြန်မာစာအဖွဲ့ဝင် | အဖွဲ့ဝင် |
| ဒေါက်တာထွန်းတင့် | မြန်မာစာအဖွဲ့ဝင် | အဖွဲ့ဝင် |
| ဒေါက်တာခင်အေး | မြန်မာစာအဖွဲ့ဝင် | အဖွဲ့ဝင် |
| ဒေါက်တာသန်းဦး | မြန်မာစာအဖွဲ့ဝင် | အဖွဲ့ဝင် |
| ဒုတိယ ညွှန်ကြားရေးမှူးချုပ် | မြန်မာစာနှင့် ဘာသာစကားပညာရေးဦးစီးဌာန | အဖွဲ့ဝင် |
| ဦးစိုင်းလှိုင်မင်းထက် | ဦးစီးအရာရှိ၊ အထွေထွေအုပ်ချုပ်ရေး ဦးစီးဌာနချုပ်၊ ပြည်ထဲရေး ဝန်ကြီးဌာန |
အဖွဲ့ဝင် |
| ဗိုလ်မှူးကြီးမြတ်မင်းဦး | ဌာနမှူး၊ တပ်မတော် (ကြည်း၊ ရေ၊ လေ) သတင်းနည်းပညာဌာနမှူးရုံး၊ ကာကွယ်ရေးဝန်ကြီးဌာန |
အဖွဲ့ဝင် |
| ဒုတိယဗိုလ်မှူးကြီး အောင်သူရ | ခေတ္တဌာနမှူး၊ တပ်မတော်သိပ္ပံနှင့် နည်းပညာသုတေသနဌာန ကာကွယ်ရေး ဝန်ကြီးဌာန |
အဖွဲ့ဝင် |
| ဦးမြင့်ကျော် | ညွှန်ကြားရေးမှူး၊ သုတေသနနှင့် သတင်းအချက်အလက် ဌာနခွဲ၊ ပြန်ကြားရေးနှင့် ပြည့်သူ့ဆက်ဆံရေးဦးစီးဌာန၊ ပြန်ကြားရေး ဝန်ကြီးဌာန |
အဖွဲ့ဝင် |
| ဒေါ်နွယ်နီစိုးရင် | ညွှန်ကြားရေးမှူး၊ သတင်းအချက်အလက်နည်းပညာနှင့် ဆိုက်ဘာလုံခြုံရေးဦးစီးဌာန၊ ဆက်သွယ်ရေးနှင့် သတင်းအချက်အလက် နည်းပညာဝန်ကြီးဌာန |
အဖွဲ့ဝင် |
| ဒေါ်နွဲ့နွဲ့ရီ | လက်ထောက်ညွှန်ကြားရေးမှူး၊ မြန်မာစာနှင့် ဘာသာစကားပညာရေးဦးစီးဌာန၊ ပညာရေးဝန်ကြီးဌာန |
အဖွဲ့ဝင် |
| ဒေါက်တာဇာနည်အောင် | ညွှန်ကြားရေးမှူး၊ အမျိုးသား စံချိန်စံညွှန်းနှင့် အရည်အသွေးဌာန၊ သုတေသနနှင့် တီးထွင် ဆန်းသစ်မှုဦးစီးဌာန၊ သိပ္ပံနှင့် နည်းပညာဝန်ကြီးဌာန |
အဖွဲ့ဝင် |
| ဥက္ကဌ | မြန်မာနိုင်ငံ ကွန်ပျူတာ ပညာရှင်အသင်း | အဖွဲ့ဝင် |
| ဥက္ကဌ | မြန်မာနိုင်ငံ ကွန်ပျူတာ လုပ်ငန်းရှင်အသင်း | အဖွဲ့ဝင် |
| ဒေါ်သင်ဇာဖြိုး | မြန်မာယူနီကုဒ် ဧရိယာအဖွဲ့ (MUA) ၏ ကိုယ်စားလှယ် | အဖွဲ့ဝင် |
| ဦးရဲမြတ်သူ | ဇော်ဂျီဖောင့် ဖန်တီးသူ | အဖွဲ့ဝင် |
| ဦးငွေထွန်း | ပုရပိုဒ်ဖောင့် ဖန်တီးသူ | အဖွဲ့ဝင် |
| ဦးထူးမြင့်နောင် | မိုင်မြန်မာဖောင့် ဖန်တီးသူ | အဖွဲ့ဝင် |
| ဦးဇော်ထွဋ် | ဝင်းမြန်မာဖောင့် ဖန်တီးသူ | အဖွဲ့ဝင် |
| ဦးအောင်ဇေယျ | မင်္ဂလာပါ မြန်မာ ဖောင့် ဖန်တီးသူ | အဖွဲ့ဝင် |
| ဦးဆန်းထွန်း | ပြည်ထောင်စုဖောင့် ဖန်တီးသူ | အဖွဲ့ဝင် |
| ဒေါ်မြင့်မြင့်သန်း | မြန်မာနိုင်ငံ ကွန်ပျူတာ အသင်းချုပ် | အဖွဲ့ဝင် |
| ဦးရာဘီ | မြန်မာနိုင်ငံ ကွန်ပျူတာ အသင်းချုပ် | အဖွဲ့ဝင် |
| ဒေါက်တာထွန်းသူရသက် | တွဲဖက်အတွင်းရေးမှူး၊ မြန်မာနိုင်ငံကွန်ပျူတာ အသင်းချုပ် | တွဲဖက် အတွင်းရေးမှူး |
| ဦးဇော်မင်းဦး | အတွင်းရေးမှူး၊ မြန်မာနိုင်ငံ ကွန်ပျူတာ အသင်းချုပ် | အတွင်းရေးမှူး |
ပညာရေးဝန်ကြီးဌာန၏ ကြေညာစာ
ကွန်ပျူတာသုံး မြန်မာစာစနစ် ပြောင်းလဲအသုံးပြုရေးဆိုင်ရာ ကော်မတီအား ပညာရေးဝန်ကြီးဌာန၊ ပြည်ထောင်စု ဝန်ကြီးရုံးမှ စာအမှတ် မူဝါဒ(ယူနီကုဒ်/ကော်မတီ)၂၀၁၆(၂၄၀၁) ဖြင့် ၂၀၁၆ခုနှစ်၊ မတ်လ (၁၀)ရက်နေ့တွင် ဖွဲ့စည်းလိုက်ကြောင်း ကြေညာခဲ့ပါသည်။ ကော်မတီဖွဲ့စည်းခြင်း ကြေညာစာအား ဒီလင့်ခ် ကနေ ဒေါင်းယူ ဖတ်ရှူနိုင်ပါသည်။
ကော်မတီ၏ လုပ်ငန်းတာဝန်များမှာ မြန်မာယူနီကုဒ်စနစ် အားအချိန်တစ်ခုတွင် ညီတူညီညာ ပြောင်းလဲအသုံးပြုနိုင်ရန်၊ ပြောင်းလဲ အသုံးပြုခြင်းဆိုင်ရာ အခက်အခဲများအား ကူညီဖြေရှင်းပေးရန်နှင့် စနစ်ပိုမိုကောင်းမွန်စေရန်အတွက် လိုအပ်ချက်များရှိသည်များကို Unicode Consortium အဖွဲ့အစည်းနှင့် ချိတ်ဆက် ဖြေရှင်းပေးရန်တို့ ပါဝင်သည်ကို တွေ့ရပါသည်။
ကော်မတီအား မှတ်တမ်းတင် ကြိုဆို
ကွန်ပျူတာသုံး မြန်မာစာ စံစနစ် ထပ်မံ အတည်ပြု သတ်မှတ်ကာ မြန်မာတစ်နိုင်ငံလုံး ပြောင်းလဲ အသုံးပြုရေးအတွက် ကြိုးစားသွားမည်ဟု သိရှိရပါသည်။ မြန်မာနိုင်ငံသားတိုင်း စနစ်တစ်ခုတည်းပေါ်တွင် အခြေခံကျကျ စနစ်တကျ အသုံးပြုနိုင်ပြီး မြန်မာနိုင်ငံဖွား တိုင်းရင်းသား ဘာသာစကားများ တိုးတက်လာရေး၊ အသုံးချ နည်းပညာပစ္စည်းများ အမြန် ပေါ်ပေါက်လာနိုင်ရေးတို့အတွက် နိုင်ငံတော်အဆင့် ကော်မတီ ဖွဲ့စည်းနိုင်ခြင်းအား ကြိုဆိုပါသည်။
ဤအဖွဲ့အစည်းအနေဖြင့် ကျွန်တော်တို့ အားလုံး ခက်ခဲနေသော ပြောင်းလဲမှုကြီးအား အဆင်ပြေ ချောမွေ့စွာ မည်သို့မည်ပုံ ကူညီဆောင်ရွက်ပေးမည်ကိုကား စိတ်ဝင်တစား ရှိလှပါသည်။ နောင်မဝေးတော့သော အနာဂါတ်တွင် ကျွန်တော်တို့အားလုံး ဆယ်စုနှစ် တစ်ခုစာ အငြင်းပွားဖွယ် ဆွေးနွေးပွဲများ၊ အမျိုးမျိုးအဖုံဖုံကွဲပြားနေမှုများအား စုစည်းပြီး အဖြေရှာနိုင်မည်ဟု မျှော်လင့်မိပါသည်။
ကျွန်တော်တို့အားလုံး၏ မျှော်လင့်ချက်များ ဤကော်မတီကြီးဖွဲ့ပြီးသည်အထိမှ တစုံတရာ ဖြစ်ပေါ်မလာခဲ့လျှင် ကျွန်တော်တို့ နောက်နောင် မျိုးဆက်သစ်များ၏ လှောင်ပြောင်မှုများအတွက် ကြံ့ကြံ့ခံနိုင်ရန် ကြိုတင် လေ့ကျင့်ထားရုံသာ ကျန်တော့ကြောင်း ကွန်ပျူတာသုံး မြန်မာစာ စံစနစ် တစ်ခုအား မျှော်လင့်နေသော လူအများစုကိုယ်စား မြန်မာယူနီကုဒ် ဧရိယာ အဖွဲ့မှ မှတ်တမ်းတင်အပ်ပါသည်။